在家工作

2020年的確是一個與別不同的年頭，好記得勒邦占士都講過希望整個2020年消失，我估呢個可能係好多人嘅心聲。年頭Kobe過身，好多人都感到無比震驚同悲傷，然後疫症大爆發，由初期睇住中國嘅數字不斷上升再回落，都見到郵輪上嘅確診數字又不斷上升，之後再傳到去南韓個教會到爆發，本來都好似同自己嘅距離有啲遙遠。但係去到三月之後，當疫症傳到去伊朗同埋意大利之後，就好似一發不可收拾咁，個數字直線上升，我估好多人除咗睇啲股價嘅圖表之外，呢排最留意嘅應該都係確診數字嘅圖表，想睇下條curve幾時回落。講真，現在所發生的事情應該是幾代人都從來未遇見過的。尤其現在資訊咁發達，世界上任何地方發生的事情我哋都可以好快咁接收到，就更加可以令到我哋感覺到件事情嘅嚴重性同埋恐怖。

暫時呢一件事直接帶俾我暫時最大的影響（間接的也有，但跟題目無關，所以不述）就是要整天都待在家中，由於疫情首先在大陸發生，無可避免我們香港其實是由第一天起已經要在作戰狀態，因為小弟工作性質關係公司容許在家工作，所以其實我打從農曆新年以後開始，超過九成的時間都是在家中工作的，到了今天都真的差不多去到三個月了！從前冇事冇幹的時候，會覺得在家工作是一份優差，因為冇王管呀嗎！但現在，要一次過在家中工作幾個月，才知道原來在家也不一定是千日好的。可能因為自己工作需要專心的關係，而自己專注力其實比較低，再加上兩名小朋友也要屈在家中，他們所需要的無時無刻的關注，也真的令我和老婆都快要崩潰了。當你發現要讀一個電郵都要被打斷十數次，而每次重讀都搵唔番自己上次睇到邊度嘅時候，可以話是對自己EQ無上限級的大挑戰！當然我覺得小朋友們只能屈在家中也是十分可憐的，尤其是大女今年K3 ，我都好想佢好好咁享受幼稚園的最後一年，多點跟老師和同學們相處，才會有一個美滿的畢業，可惜疫情嘅關係，講真現在復課無期，我都戥佢感到好遺憾，但當然啦，健康才是目前最重要的，疫情一日未退，一日都未能真正放心。

在家工作對情緒上最大的困擾就是因為好像工作與私人時間沒有了界線，當有公司未完成的時候，就會整天都心掛掛，晚飯過後都還想繼續完成，好像沒完沒了的。我就有好幾天都做到凌晨12點之後，主要原因都係日間太難集中精神，所以要晚間追回時間。可能真係太困擾的關係，我發覺自己呢排耐性好差，都幾容易發憫憎，希望自己會慢慢改善啦！

除了情緒上面會大失控以外，身體上也有點變化，由於我自己習慣在家中都會每日帶住隻Apple Watch，所以都睇到每日嘅步數都由正常日子的八，九千跌至二千以下，整整比正常少左六七千，雖然暫時磅數冇乜點上升，但肚腩個圈就好似長大咗，相信係因為肌肉已經開始流失～～當然亦都可能係因為自己12月扭傷腳的關係，之前都已經少咗運動嘅原因，而家唯有間中喺YouTube搵啲運動片嚟跟住做，但係都應該只係止下咳我都真係要幫自己做返個好啲嘅每日schedule，Balance一下自己。

另外一樣在家工作對我嘅改變就係睇股市都貼咗，最大原因當然係因為三月個投資市場風起雲湧，而小弟可能有啲部署比較急進，所以有好幾日都幾panic，嗰幾日就真係差唔多全程睇住個市就算，公司部腦就開着個email睇吓有冇人搵我，我估如果嗰幾日我係喺係公司嘅話相信我嘅panic會更加嚴重。幸好而家都叫早渡過咗，少少損手難免，但幸好都唔算係入晒肉。不過係投資個方面亦都係要好好計劃一下。（遲啲再update下！）

雖然個世界好似好多嘢發生，但係呢個地球依然係會向前轉的，困難嘅嘢一定會存在，但係總要睇吓自己點樣面對同埋解決。其實最重要嘅都係睇下點樣好好計劃自己，呢一樣就係我最弱的，因為我最叻嘅就係得個諗字。希望之後可以多啲記錄下自己嘅計劃再慢慢實踐。

其實在家工作都有其他好處的，下篇再續。