2823期權策略 二月update（1）

是人算不如天算？剛剛星期六先決定要行呢個2823plan，點知一開波就遇上最差的情況。A股開唔到紅盤不特至，仲要拾級而下。搞到我出師不利....

報一報做左啲咩transactions先：

其實喺月頭嘅時候已經short左個即月＄12嘅PUT，收premium ＄0.24。
星期一時，見2823跌了一點，所以照計劃SP了下月的＄12，收＄0.47。


然後，就係惡夢嘅開始，A股不斷咁回，去到今日，2823嘅價已經跌到＄11.08！！所以想賣又賣唔到，果兩個SP又都升到＄1，賬面各自跌咗＄0.71＆＄0.54。

去到而家呢個情況，就睇下會唔會再跌喇，行駛就一定唔會比佢行使架喇，但係個2月SP聽日平定係下個星期初平，就要睇睇聽日仲會唔會跌，如果再穿＄11我就會平左先，可能會立即轉個SP去四月，但就係做＄11.5。


其實今次開得唔順，應該同個策略無關，係個timing問題。2823個價由2月15日的＄11.88跌到今日2月21日的＄11.08，即係話唔見咗＄0.8 （所以而家我正股未賣，實際係雙輸～～）。同個策略比較，個P＆L其實仲叫做蝕少咗啲添（因為delta嘅關係）。到二月完咗先至檢討一下。

正股方面，跌到呢個level我都唔想賣住，決定維持＄12目標先出貨。我會到賣左正股之後先開始比較呢個策略同埋持有正股嘅利潤嘅分別。

希望2823止跌回升！

2823期權策略

本身自己持有10000股2823，斷斷續續持有左好幾年，平均嘅成本價係＄10.64。我因為想套番啲資金出來進行其他投資，見2823最近呢幾個月都有唔錯嘅升幅，所以想賣咗佢。但係我又覺得長遠嚟講，A股應該會繼續反彈，所以我就諗咗以下呢個方法黎嘗試代替持有正股：

呢個方法我會係而家2月開始做，首先就係SP＄12，收期權金大約＄0.13。無論月底會唔會被行使，我都打算月底會沽咗隻股佢，套番十零萬先。

之後，就係我嘅每月操作，由二月底開始，每月都會咁做，行動如下：
1. 每一個月，我都會維持住有兩手SP（一手等於5000股）。行使價將會選擇剛剛價內的（i.e.現價＄11.8，我會選SP＄12），兩手SP將會係一手即月，另一手係下月。
2. 當接近月尾時，會先看看即月的那個SP是否已由價內入咗價外，會唔會變廢紙。
a) 如會，當然最好，期權金袋袋平安。之後就可以再去SP再下一個月嘅剛價內嘅價位。此時那個下月SP都應該已經入咗價外，但因為仲有成個月時間值去賺，所以唔會平住。
b) 如不會，就平倉，把SP轉到下下月。此舉最好係在最後交易日前一兩天做，以免有突發事件，i.e.我突然唔得閑上網做trade。
3. 最差情況，如果2823突然大跌，跌至被起我個SP有兩個期權價位嘅距離，那麼係搬倉時就要認輸，把SP搬低一格。
4. 大好嘅情況，如果2823大升，我的ITM SP已經變得很價外的話，為了貼近正股升幅，當見到價外了一個期權價位的話，就平倉賺錢再做下一格嘅SP，賺多一點期權金。

我做呢一套策略的原因係：
1. A股剛於去年見底，同其他市場對比相對落後，估計長遠來講應該係會再慢慢回升，所以SP應該風險不大，雖然我呢個策略係唔打算接貨，但如稍一不慎接了貨都會有信心隻股會上得番，同埋因為呢一隻係ETF，所以倒閉嘅機會係極低。
2. 選擇short ITM put嘅原因係因為想盡量貼近正股嘅走勢，而且又想貪心咁賺啲時間值。果啲時間值至小都可以cover番啲手續費
3. 同埋上面（4）出現嘅時候個回報同正股嘅difference。
4. 就算係出現（3）呢個情況，我啲SP要越搬越低，同埋平倉時會蝕錢，果啲時間值應該都可以幫補下。同埋蝕嘅錢應該都係同我之前手持正股差不多，但我啲現金就可以用於其他地方。


總結：最好嘅situation可能係慢升，每個月都只係升破我的SP價，那我就可以升幅加時間值兼賺喇！

希望我嘅想法已經夠全面，我會定期喺度review下個策略，睇下有什麼需要改良。

開始

自從舊年年中開始接觸期權之後，一路都好想記錄下自己嘅一啲操作，當做溫故知新，從自己一路嘅對對錯錯之中學習。自己每一日都有好多唔同嘅諗法，因為驚自己唔記得，所以好多時而家都會將啲idea寫落email度，然後send翻俾自己，慢慢都差不多變成一個每一日嘅習慣。就係咁，諗諗下，橫掂都係寫，不如記錄喺個blog度，可能仲會更加容易去睇翻自己啲諗法，更加好咁去有條理地去管理自己嘅投資。另外有時係報紙上睇到嘅一啲關於股票嘅消息，好多時我都係send翻email俾自己做reference。而家有呢個blog，我都會將果啲文章都save埋喺度，以供日後參考。
就由2月開始，希望我可以好好咁去運用我所學到嘅知識同儲到嘅經驗，去靈活咁好好處理我手頭上嘅股票投資。期權係一樣博大精深嘅投資工具，我希望可以越學越能夠領略多啲其中嘅奧妙。