倒數四星期

不知不覺，在家工作已經差不多四個月！

能夠有咁長嘅一段時間可以留在家中，的確係一個好難得兼難忘嘅經驗。雖然上一篇有提到話每日在家工作被兩隻細路搞到崩潰，但係其實想深一層，如無意外 （touchwood！）呢個時期應該會係我人生中最長嘅一段每一天每一刻都是跟自己家庭相處嘅時間，其實我好珍惜呢啲額外嘅得著。尤其是兩個細路還細個，跟他們的相處都係樂趣居多，難得而家佢哋都仲係咁依賴我哋，咁痴住我哋，雖然每天我依然都係要不斷鬧鬧鬧住佢哋，但由於我們其實自從1月尾開始，基本上每日三餐都係一齊食的，所以我覺得全家人的關係其實係變得更加密切嘅 ，好希望兩個小朋友都可以同我哋一樣會享受呢段咁難得嘅日子。

奈何開心嘅日子過得特別快，就嚟就要同呢段時光講拜拜，因為每一件事情總會有終結，而我哋嘅呢一段『穴居』生活，隨住亞女6月15日復課的時候就會完結，雖然阿仔就無奈地要學期報銷，但係點都好過兩個都無得返啦！而我跟太太都應該差不多功成身退，亦都差不多時間完成全職work from home 嘅生活喇！雖然我估經過咗呢幾個月嘅測試，就算在屋企工作始終在technology上會有不足，但總體上來講其實問題不大，當然效率來講可能在公司跟同事們一齊做，開會傾可能會直接啲，但係你話其實係唔係真係必須要一星期個個員工五日都要坐足喺公司？我相信啲公司高層都有晒答案，所以嚟緊好大可能辦公室嘅面積會越縮越細，open office 嘅風氣會越來越盛，相信啲大企業慳cost都可以慳唔少。（辦公處租金會否下調？）

題外話：不過公司最近都有大震動，希望我呢啲小人物唔會受牽連啦。

另外，呢段突如其來的『穴居』生活就真係有點不似預期，本來諗住會做到的事，例如：執屋，睇多啲書／劇集／電影，打下機，同埋想寫多啲blog，差不多全部都只能夠好有限度地做咗一點，睇嚟我嘅執行力真係有好大嘅改善空間.......


P.S. 這篇blog記實由上星期開始寫，不過寫咗一個禮拜，哈哈，所以到了今天其實只係淨返三個星期，希望亞女好好享受餘下三週爸爸媽媽的full service 吧！