入四

今個月又正式進入了人生的另一個新階段了，迎來呢一個關頭都認真唔容易，從來都無想過自己去到呢個歲數會係一個咩嘢嘅人，一路都覺得係好遙遠嘅嘢，但係過下過下，竟然入了4字頭。
講真，真係好難相信呢個事實，但係事實係唔需要你信嘅，的確而家就入了4！！
在我心裡其實都仲係覺得自己好似畢業不久，初出茅廬咁，但係其實數下數下，工作都快有十九幾個年頭了，去年尾剛剛見到個trainee，啱啱畢業的，其實年齡我真係可以做到佢老豆，都真係幾難接受。

望住塊鏡，可能自己日日都有照鏡，又唔覺得自己老咗好多，哈哈。但係望真啲，頭髮其實唔染的話應該係全白（呢排在家工作了兩個幾月，染髮錢都慳番），頭髮數量同額頭的高度就唔好題喇，雖然我成日都覺得人地睇唔到我頭髮稀少，但係心底裏都知道這是公開的秘密，男人的悲哀。

體能上前幾年其實好咗一排，當年係力谷之下，體重跌左，個人fit咗，就連踢波都勁咗（我覺得），呢兩年懶咗啲所以體重回升返啲同埋無咁fit，但都還可以。直至舊年年尾嚴重拗柴，直到今日都未完全好返，都未知係咪要係球場上退役，諗起都有啲灰，希望只係真係因為年紀大復原慢一點啦，仲有復原的一日就好了！

啱啱呢年自己裏裏外外都發生咗好多唔太好嘅事，社會上嘅就更加唔好提啦，而家連地球上都有大難題未解決。真係老土啲都要講句希望明天會更好啦。

自己寫blog斷斷續續都over 10年，其實當然都係自娛性質啦。雖則我睇下原来我都有一兩篇blog文係有幾百個views，但係我都知其實都係自己寫比自己睇多。當然啦，自己懶根深種，就算腦袋裏時常有好多嘢想寫，但係能夠寫下嘅都真係十分一都未必有。
踏入40其實本來想改個新名由頭寫個新blog，因為想有個新嘅開始，尤其是而家嘅年齡令我感覺好似係上半場已完，正式開始下半場咁。但睇下睇下，自己其實有呢個blog，同另一個主要寫自己嘢嘅blog，再加一個facebook page（都有220個like架，哈哈，雖然我唔知佢哋點嚟），又整多個blog好似玩咁（講到自己好似好認真咁），同埋自己溫故知新睇下個blog，又真係覺得應該貫徹落去，好好咁去記錄一下自己，所以都係決定唔再始亂終棄，繼續喺度啦！不過嚟緊可能會整理一下之前啲文，分返好類別，等睇嘅時候可以有系統啲。同埋之後應該會集中啲係呢度寫，除咗投資之外，其他咩都會擺埋係度。
文字其實真係一樣好奇妙嘅嘢，就算自己文筆唔好，寫的東西又唔太有條理，但係紀錄下來嘅自己又真係帶到一種好特別嘅感覺比我，可以幫到我更加知道自己係點樣嘅人，同埋諗咁啲咩嘢。所以係人生下半場開始嘅時候，希望自己可以多啲寫嘢，時常提醒下自己。