2x 睇 YouTube

年紀漸長之後的一個改變就是每天看新聞的習慣，由十多年前的先睇娛樂版，到近年都是先睇經濟消息，然之後體育，娛樂新聞對於我來講都已經變得可有可無，當然，本地娛樂近年的失色是一個原因，另一原因可能就係自己成熟了，冇以前咁八卦吧（好似兜個圈讚緊自己）。

另外，睇新聞的方法都跟以前有很大的改變，還記得初畢業自己住的時候，都間中放假時會買份報紙睇，有時仲會跟當時女友到茶樓食點心邊看報（放在現在看，這絕對是一個中坑活動）。不過其實當其時大部份時間都是上網睇報紙的了。到了近年，說真的，連電腦都少用，睇新聞，就更加係只會在手機apps上看。這個發展其實有好有壞，有好多人都說過，今時今日由於網路資訊太發達，所有東西都只追求一個快字，最重要是吸引到讀者眼球，所以標題一定要夠爆，內文可能短短數百字就交代了一整件事，因此很多時候那些報導都可能只是流於片面的敘述，缺乏深入的分析及資料提供。好處可能係幫助到人更快地掌握多些資訊，但壞處就是掌握到的就大多數只是很片面的東西，更甚者是可能只睇了標題自己已經有了個結論，但實際可能跟事實有段距離。

而到了近一兩年因為自己感覺對眼好似差咗，所以有時就到YouTube搵嘢睇，感覺又真不錯，可能因為係講嘅關係，一般報導同分析感覺都詳盡啲，而又因為唔係用眼睇，又感覺自己好似可以專心啲咁聽 （雖然有時我係襯陪仔女訓覺時帶住耳筒聽，但結果有時我是第一個瞓著的。）。所以近來每一天都固定會play 幾個YouTube Channel 來聽下啲經濟及股市的分析。

最近，就係喺其中一條YouTube 度，開心大發現到一件事情， 這個視頻其實是出名blogger 止凡兄一條關於對時間分配的分享，我真心佩服他對時間可以講係運用得咁出神入化，有事業有家庭之餘仲可以寫blog出書做運動拍YouTube！真係寫一千個服字俾佢。我自知成功人士跟不成功人士的最大分別就是如何可以有效咁運用時間，而我，作為一個不成功人士 （失敗者？）的典範，雖然在視頻中有好多好方法可以借鏡，但我估懶惰如我者都幾難可以實行到。不過，其中一樣止凡的分享卻令我大有得著，就係原来睇YouTube係可以較速度嘅！！可能好多人一早知，但我唔知，哈哈。自己試過之後，發現原来大部份嘅video 較咗2x之後都仲係可以聽得清楚嘅，真係聽過先知原來原來啲人講嘢慢嘅，不過亦都可能係原來我個腦係可以轉得咁快嘅，感覺好似有啲衝破極限的感覺！不過如果是一些我覺得重要的topic，我就會較1.75x，比個腦有多點時間緩衝消化。

於是，每日我就可以用相同的時間聽多點不同的節目，雖然好多時其實同一個YouTuber講真每日所講嘅可能大同小異，有時都未必需要每日都聽，但個world of YouTube 實在係太闊喇，我其實都bookmark 咗唔少嘅片想慢慢睇，而家咁樣正好可以用1.75x 至 2x 來慢慢清貨！