Pairs trade 策略 (平保 vs 港鐵）(1) 起步篇

近年好少記錄自己投資的事，一來懶，二來自己越睇得多其他人的分享就越覺得自己真係皮毛都不如，所以都真係唔班門弄斧算了。

不過自己成日CD rom 睇咁多其他人啲野，自己都有啲癮想寫下，咁啱近來做左啲同以前唔同嘅玩法，所以就不如記錄低下，自己日後參考也好。

其實都唔算係啲咩特別野，哈哈。如標題所講，就係做左個pair trade (希望冇講錯名）, 做嘅係 long call 平保， 同long put 港鐵 (其實有long put 埋匯豐，不過後尾覺得put 港鐵好啲，所以一路都只係加落港鐵度。）

點解咁做？

追溯最早原因係我成日都好後悔自己好早清晒啲平保，成日想買返（正宗散戶心理）。但有留意佢近年走勢都知，佢嘅股價根本就係一去不返，我呢啲正宗散戶只有得個睇字，雖然不斷Short Put 都叫做有啲期權金做安慰，但都彌補唔到內心果種點點嘅遺憾。

所以，既然short put 我覺得只係安慰，直接買正股又過唔到自己覺得傻仔左低賣高買嘅無謂心理關口，於是我就決定做 long call !  而我今次決定做的，是ITM 的 call, 原因當然係想盡量輸少啲時間值啦，當然個本會大啲，但我本住嘅心態係用做左margin 去買正股咁，而唔係真係想食佢短期來爆上果啲，因為我根本唔會知佢之後嘅走勢會係點。

好喇，做左long call喇，以一個每月都賺時間值為目標嘅我，當然又係散戶心理，覺得今次要付出時間值而覺得有點不是味兒。不過如我之前所講，其實我一路都有做short put 平保的，所以時間值呢邊就當平手吧，心理即刻平衡返啲，哈哈。

下行風險？

時間值搞點，咁我又諗下，如果佢唔升咁又點？始終買嘅係 options,唔係正股，正股都話坐下，option 到期就冇仇報（當然可以rollover,但我自己通常就會當係新一回合，即係之前已經輸左），仲有因為而家係leverage 左，即係話所有平保嘅上落都會倍大左，所以我就諗下點樣去控制下個風險呢？

我諗到嘅就係搵一隻我最唔睇好嘅股票，long put 佢，嚟食個downside。所以就揀左港鐵。呢排發生咩事就唔使重覆啦，我就只係覺得連串事件令到我對佢嘅管理層嘅能力同權力都有好大疑問。所以就long put 左佢。因為我覺得如果個市係升嘅，我相信平保會升多啲，而跌的話，港鐵會跌多啲。

最大風險係？

因為係pairs trade，所以個風險某程度上應該會係對沖咗 （做得正確的話）。但係如果睇錯，結果係港鐵原來唔係咁差，表現好過平保的話.....

下篇再續