2020/08 指數期權 (4) Good Ending

近排好忙，主要係因為亞女剛剛升上小學，雖然最初幾個禮拜都只係網上教學，但係原來現今除了學生讀書辛苦之外，家長都真係可能仲大壓力，每日都可能需要係唔同嘅channel 去接受學校嘅資訊，要睇回條，睇下小朋友有咩功課要做，幾時要交，課外活動又要參加，學術嘅又有，運動嘅又要有，音樂嘅更加要有，真係絕對係辛苦過以前自己讀書好多。真係唔知鄧亞女辛苦定係鄧自己淒涼好。不過正所謂人在江湖，身不由己，參加得個game 就唯有跟返佢個rules 去玩，無計。

講完讀書嘅game，就講返期權呢個game啦，都遲咗成個月先再update返個8月我的HSI 期權嘅境況，最尾結算收25531，如願以償收到大約兩萬六千幾嘅利潤，當然係好滿意啦。其實呢個8月就係對於我個strategy 來講最理想嘅scenerio。全個月都只係做咗8個 trades，就可以有呢個成績，又唔使太過費神咁平安渡過，真係唔錯架！ 

不過9月就遭遇滑鐵盧，本來一路都好地地，但係呢個禮拜嘅急跌時我嘅應對就做得比較差，有啲心存僥倖博佢會彈番上去，無走到啲240SP，結果而家接近跌到23000..... 幸好我23300左右終於痛定思痛斬晒纜，不過應該呢個月都會不幸地要蝕錢，又係一個衰貪心同埋唔收紀律嘅教訓。而家希望結算時可以上返啲，如果唔係9月就可能要嘔返晒8月啲利潤出來喇..... 

所以呢，證明我玩呢個game 依然係未稱職，真係要好好記住紀律同埋決斷真係好重要。緊記！