震撼

今年的農曆新年的確非一般。
先有武漢肺炎發展一轉直下，嚴重程度令到阿爺想㩒都㩒唔住，焗住要封城，每日睇住個確診同埋死亡數字，都真係咪話唔驚，同埋，所謂你知我知單眼佬都知，報出嚟嘅數字一定係比起真實情況少啦，我好肯定有好多根本都未驗到係咩事但係已經拜拜咗嘅，應該都被火化了，唔通仲慢慢驗下睇下係咪要加返落條數度咩。
今次事件有好多人都再次對香港政府嘅處理手法極度不滿，尤其比對鄰近嘅澳門就更加給完全比下去。我自己就覺得呢個comment有少少不公平嘅，始終香港同澳門個size同population爭太遠，有好多措施又真係唔係話實行就實行，要考慮嘅地方又真係會多好多嘅。但係，以上被不代表我覺得香港政府做得好，相反地，我自己覺得今次抗疫事件政府嘅表現比起上次社會抗爭事件（其實都未完）更差，可以話係去到比絕望更絕望嘅地步。今時今日，呢個政府民心又冇，對上又不見得得寵，所做的事全部都進退失據，每一日都在打倒昨天的自己，佢哋最成功就係團結咗全香港嘅人去閙佢哋。咁，又有咩意思呢？
不過，其實對於小弟嚟講，這個新年最震撼的，是高比拜仁的離世。
說真的，Kobe其實從來都不是我偶像，同好多我年代的睇籃球的人一樣，MJ先係我頭號偶像，作為MJ的第N個接班人，講真，除咗嗤之以鼻之外，我係冇其他反應。
之後慢慢MJ二次退休再復出，另一邊廂Kobe已經獨當一面，同Oneal一齊贏咗啲總冠軍，我就正式加入咗Lakers 嘅haters 行列，因為好簡單，對於唔係自己欣賞嘅隊伍或者球星，就自自然然唔想佢哋成日贏架喇，呢個現象每一個朝代都會發生。
對Kobe嘅改觀可能係LBJ 出現並上位之後，哈哈，我估呢啲就係中年危機（雖然當時我應該30都未到）嘅第一個symptom，見到啲新嘅嘢就去否定佢，成日覺得新不如舊。而真正覺得佩服佢嘅就係當知道原來佢嘅訓練係比每一個人都刻苦之後，就真心敬佩佢。因為自己係一個不折不扣的懶人，所以我對一啲好有紀律，好有恆心嘅人一路都係最佩服嘅，尤其是好似佢哋呢啲已經成功上晒位嘅，真係唔知有啲咩嘢可以推動到佢哋去加倍鍛煉？所以曾經有friend問我鍾意美斯定C朗，我就話係C朗，因為論天賦我覺得全世界無人及美斯，但係我好肯定C朗係靠無咁好嘅天賦但係可能係十倍嘅鍛鍊，先至令到佢可以去到同美斯一樣嘅高度，我覺得果種精神更令我欣賞。而網球之中，就係我嘅頂級偶像拿度，佢嘅熱誠同埋努力又係令我敬佩萬分。
直到Kobe退休，最尾果場都攞到60分，我真係O晒嘴，雖然對手可能係有點放水成份，但係用呢個形式嚟告別真係除咗話佢係一個true legend 之外都唔知可以點形容。佢真係一次又一次用自己嘅實力去話畀人聽佢係幾咁偉大。由於其實我年紀只係細佢少少，無可厚非其實佢比起MJ更加係我睇波個年代嘅籃球裡面嘅第一號人物（我最初睇NBA已經係96年MJ第二次三年霸嘅開端）。所以，朝早剛剛在whatsapp提到有人提起呢件事嘅時候，都真係呆晒，希望係fake news，但事與願違，悲劇真係發生咗。昨天跟朋友們新年團拜時提起呢個噩耗都真係忍唔住有啲唏噓.......

RIP, Kobe